Мелания Римар

 DSCN2149МЕЛАНИЯ РИМАР (Рамач) народзена 30. авґуста 1958. року у Руским Керестуре, дзе закончела и основну школу и Ґимназию по руски. Дипломовала на Природно-математичним факултету, на ґрупи за ґеоґрафию у Новим Садзе.

Писац и обявйовац перши писньочки почала у Пионирскей заградки, познєйше у Маку и Литературним слове. Єй перша кнїжка поезиї Ранши новини, наменєна старшим, обявена 1983. року, а потим почала глєдац свойо место у швеце литератури за дзеци. Обявени и збирки писньох Лєто у дїда (1987), Слунечков сон (1991), Пошептала ми птица (1999), Шнурка и ґужлїк (2008), и збирки приповедкох и сказкох Сказков заглавчок (2001), Бајкино јастуче (2007), Чилаш, а без принца (2012) и Жвирки у азбуки (2013).

Заступена є у Антолоґиї дзецинскей поезиї Хмара на верху тополї (по руски), потим у Зборнїку писньох за дзеци предшколского возросту Рушаме до швета (Подґорица, 2003), у Антолоґиї писньох о бавискох Музей бавискох (Крушевац, 2006), у Антолоґиї за дзеци и младих Коло приятельох (Беоґрад, 2007), у Антолоґиї новшей сербскей поезиї за дзеци и младих Кед шерцо заблїшнє (Рума, 2009), у Антолоґиї гумористичней приповедки за дзеци Танцоше на шмишним дроце (Беоґрад, 2010) по сербски, потим у Букваре и вецей учебнїкох по руски, як и у Лектири на румунским язику. Даєдни писнї и приповедки єй преложени и на українски, словацки, болгарски и македонски язик.

Роби у Новим Садзе, а бива и твори у Петроварадинє.