Нови асфалт и „лєжаци полицає”

автор влдї 28. юлий 2016

Спрам плану роботох Явного подприємства за квартельни услуги и будовательну жем општини Шид, нєдавно асфалтовани улїци Мацери Євросими и Велька Влаховича, и Новей 4 у населєню „Восток”. З тима роботами источасно пошорене и одцеканє дижджовки. По словох Александра Йовановича, директора спомнутого подприємства, асфалтоване вкупно 1,5 километри, а за тоти роботи були опредзелєни 15 милиони динари з општинского буджета.

Йованович наглашує же роботи буду предлужени у улїци Златка Шнайдера з преширйованьом асфалтней драги и ришованьом одзеканя дижджовки, а будзе асфалтована и улїчка медзи Омладинску и улїцу Максима Горкого у хторей по тераз нє бул асфалт.

– У плану маме и ушорйованє паркинґох у населєню „Восток”, а тиж и платанє асфалтних локалних драгох хтори у компетенциї локалней самоуправи. У городзе на трох местох зме положели „лєжацих полицайох”, водзаци рахунка насампредз о безпечносци дзецох. „Лєжаци полицає” поставени у улїци Цара Лазара блїзко при дзецинскей заградки, а тиж и у улїци Княза Милоша, блїзко при дзецинскей заградки у населєню „Єлица Станивукович-Шиля”, а єден поставени у улїци Николи Тесли. Тота инвестиция коштала милион динари – надпомина директор Александар Йованович.

Пред початком манифестациї „Културне лєто”, тиж пошорени простор коло будуцого будинка музичней школи. Викерчене коровче и вилята нова широка дражка, так же преходнїки тераз маю вецей простору за шпациранє, а досц ше достало и на естетским випатрунку. Од активносцох хтори у планє, директор Йованович додава же ше планує и ушоренє городских паркох.

(Опатрене 52 раз, нєшка 1)