НОВИ САД – Пондзелок вечар, 5. марца, у рамикох нащиви Сербиї, як госц Влади Сербиї, после розгваркох зоз министром Расимом Ляїчом и дзепоєднима державнима секретарами вецей министерствох у Беоґрадзе, предсидатель Шветового Конгресу Українцох Євген Чолий нащивел Нови Сад и стретнул ше зоз представнїками дияспори у Войводини.
У просторийох св. оца Миколая позберали ше коло штерацец представнїки руских и українских институцийох на чолє з владиком Георгийом Джуджаром. Зоз госцом з Канади була и перши секретар Амбасади України у Сербиї Наталия Маркевич. Циль нащиви почитованє людских и меншинских правох у Сербиї цо була и тема розгварки у Новим Садзе.
-Шветови Конґрес Українцох найзначнєйша и найвисша институция за дияспору України. Вон помага у ришованю велїх питаньох представительом українскей дияспори у жемох у котрих вона нашла свойо нове отечество. Медзи найзначнєйшима питанями котри визначени у розгварки у Новим Садзе похопел сом же то статус єдиней рускей Ґимназиї у Сербиї у Руским Керестуре и приход школярох зоз України школовац ше у нєй. Други приоритет то одход школярох и студентох, ваших дзецох на школованє до України, а слово углавном о високим образованю. Наздавам ше же пошвидко ришиме обидва тоти проблеми зоз заєднїцкима моцами, гварел Євген Чолий на новосадским сходзе.
Євген Чолий нащивел Сербию як представнїк Центру Шветового Конґресу Українцох зоз Бриселу же би видзел на котрим уровню ше находза людски и меншински права у Сербиї, з оглядом же пошвидко на шоре отверанє поглавйох зоз тей обласци на драги Сербиї до Европскей Униї.
