Польочуварска служба котра робела у рамикох Заводу за вибудов Општини Кула загашена прешлей єшенї, понеже и Завод загашени 1. децембра 2016. року. У рамикох тедишнєй польочуварскей служби були заняти дванацецерме польочуваре и єден координатор, а з того числа двоме польочуваре свою роботу окончовали на териториї керестурского хотара.
Завод за вибудов кулскей општини загашени пре нєможлївосц финансованя зоз державней каси, понеже му снователь була локална самоуправа, а заняти польочуваре розпоредзени на други роботни места, углавним у општинских комуналних подприємствох.
Же би ше польочуварску службу обновело, Општина Кула розписала Явну набавку за найвигоднєйшого понукача 17. марца 2017. року, котри би тоту роботу окончовали як приватне подприємство по контракту на єден рок. Конкурс раз предлужовани и два раз меняни, а вимагал и високи критериюми рижних ИСО стандардох, сертификатох, висококвалитетну опрему и лиценцираних роботнїкох Физично технїчного обезпеченя (ФТО).
Так на Конкурс сцигло лєм єдно понуканє зоз подприємства „Стар мастер” д.о.о., котре понукло цену 18 милиони динари без ПДВ, односно 21 милион и 600 тисячи зоз ПДВ.
АНҐАЖОВАНИ КОМПЕТЕНТНИ ОСОБИ
– Роботу польочуварскей служби окончуєме од 1. мая того року, анґажовани зме по контракту на период од єдного рока. У рамикох нашей орґанизациї маме 15 польочуварох и єдного координатора, то число котре одредзела Општинска управа, а з того єден у керестурским хотаре, штирме у кулским, двоме у Крущичу, єден у Липару, штирме у Сивцу и троме у Червинки – дознаваме од директора „Стар мастер”, Педї Младеновича.
Польочуварска служба компетентна нє лєм за крадзи, алє и за шицку чкоду цо ше прави по хотаре, як цо то кажде очкодованє културох на цудзих польох, палєнє остаткох од жатви, ґаженє по цудзих парцелох, виводзенє статку на пашу на цудзе польо, або прейґ цудзого поля, зберанє остаткох польопривредних културох без писаного допущеня ґазду парцели.
Потим, то и виношенє шмеца як на польо, так и на дильови, ярки и беґельчки, випущованє фекалних и одрутних водох. Одорйованє зоз дильовох, та и нєодвичательне обрабянє польох, односно зароснути парцели, окреме з амброзию. У шицких случайох, окрем кед крадза, и кед нє направена чкода, польочуваре перше опоминаю виновнїка и аж на други завод ше го приявює за потупенє за котре предвидзена материялна кара.
ЦО РОБИЦ КЕД ШЕ КРАДНЄ?
У случаю крадзи, польочуваре маю шицки овласценя як цо ма и полиция, окрем приводзеня и затримованя у другим обєкту, як цо то робя полицає дочасово у станїцох, за цо их треба причекац. Кед же ґазда влапи крадоша на своїм полю на дїлу, нє шме применьовац силу, може го затримац, алє потребне же би волал польочуварску службу, а може и полицию.
– Понеже нашо польочуваре лиценцировани роботнїки ФТО, маю допущенє и за ношенє оружия, цо потераз нє запровадзене пре преценьованє же нєт ризику. Польочуваре маю статус службених особох, овласцени су же би затримали толвая и шицко цо ма зоз собу на месце крадзи, як цо то превозка, накраднуте и подобне. Кед же толвай нападнє польочувара, вон ма право одреаґовац и применїц силу. Можем повесц же польочуварска робота ефикасна, по тераз зме успишно влапели даскельо крадошох, котри прешлїдзени полицийней управи, опоминаме и по потреби прешлїдзуєме на потупову кару за шицки файти потупеньох – гварел Младенович.
РЕЗУЛТАТИ АНАЛИЗОВАЦ НА ЖИМУ
Хотар кулскей општини ше пресцера на вецей як 48 000 гектарох, и чи польочуварска служба котра ма петнац особи може буц, и яка ефикасна, то би уж требал указац час. Резултати сиґурно будзе видно по законченей ламачки, кед ше закончи и шицки роботи у хотаре.
На териториї рускокерестурского хотара свою длужносц поряднє окончує єден польочувар, а понеже сезона оберачки паприґи, по потреби му помагаю ище троме – єден зоз Крущичу, єден зоз Червинки, котри задлужени за часц хотара котра ше дотика з керестурским ткв. Валтером и Косцелїском, и з Билей и новокулскей часци тиж приходзи єден.
