– „Майкрософт” ше „влапел” до образованя и першираз сом чула же ше даґдзе наставнїкох так хвалї и ценї и же наставнїки мали таки третман як даяки героє, або познати особи – визначела Наталия Будински.
Професорка математики у Основней и штреднєй школи „Петро Кузмяк” з Руского Керестура мр Наталия Будински, од 12. по 16. марец як єдна од 300 найиновативнєйших наставнїкох на швеце, пребувала на семинару у Синґапуру, у орґанизациї компаниї „Майкрософт”. Будинскова презентовала нашу єдинствену Школу и заєднїцу, цо велїм прицагло увагу.
Як дознаваме, то була образовна черанка наставнїкох зоз 91-ей держави зоз шицких континентох, и ище тельо особи зоз рижних министерствох образованя, представнїки тих цо ше занїмаю зоз продукцию наставних средствох, образовних технолоґийох, медийох, так же то бул вельки сход.
НАСТАВНЇКИ ИНСПИРАЦИЯ ШКОЛЯРОМ И „МАЙКРОСОФТУ”
Як то конкретно випатрало Будинскова толкує:
– Кажди дзень починал зоз преподаванями на рижни теми як цо иновациї, хаснованє рижних технолоґийох, иншаки приступи у образованю итд. Понеже то бул роботни семинар, вец зме мали роботу по ґрупох, а дали нам задатки цо тримаю же би требало ришиц у образованю. „Майкрософт” ше „влапел” до образованя и першираз сом чула даґдзе же ше наставнїкох так хвалї и ценї и же наставнїки мали таки третман як даяки героє, або познати особи. Прето „Майкрософт” кладзе акцент на образованє и наставнїкох хтори го ноша толкуюци и же вони героє, бо инспирую и дзеци и сам „Майкрософт”. Можем повесц же тото цалком иншаке одношенє и мнє особнє, а и другим велька потримовка и дальша инспирация у роботи – наглашела Будинскова.
Як нам шведочи, на семинаре єден дзень бул як пияц образованя дзе кажде презентовал свою активносц, а вона мала нагоди представиц свою роботу и свою Школу цо було досц замерковане.
НАША ШКОЛА ЄДИНСТВЕНА У ШВЕЦЕ
– Велїм була цикава наша єдинствена школа, наш микроязик. З Нового Зеланду ше заинтересовали за нашу школу зато же вони маю проблем автохтоного жительства, хтори маю свой язик и културу, а вше их єст менєй и боря ше за свойо образованє. Кед чули же єст єдна така єдинствена школа и з таку длугу традицию, така єдна мала заєднїца, сцели ше повязац, сотрудзовац и подзелїц свойо искуства. Наша школа у швеце єдинствена, и то, наисце, и там було замерковане же як функционуєме – приповеда Наталия, хтора тиж презентовала и велї активносци и з єй предмета, математики, тото цо роби на скайп годзинох и ту достала нови идеї за сотруднїцтво.
У образованю дефинитивно лєжи будучносц и хто уклада до образованя прави добру инвестицию. Сама образовна система рижнородна, алє сущносц остава иста же наставнїки, як гвари Будинскова, робя з младима хторих треба порихтац за живот, и робиц нє лєм на здобуваню информацийох, алє и на сотруднїцтве, комуникациї, применьованю знаня и ришованє практичних проблемох.
ИСКУСТВА БУДИНСКОВЕЙ ШКОЛИ ДРАГОЦИНИ
Директорка Школи Хелена Пашо Павлович з тей нагоди визначела же искуства Будинсковей Школи драгоцини.
– Ми, наставнїки, маме фахове усовершованє прейґ рижних семинарох, а Наталия ше ту визначела у тим же прешла гранїци того цо ми маме понукнуте и уключела ше до ширших активносцох дзе є очиглядно препозната и дзе отримує контакти прейґ шицкей модерней технолоґиї, а нє лєм же ше сама през тото пребива, алє уключує и наших школярох и видзим же школяре барз прилапюю модерни способ роботи и ю як професорку хтора уноши иновациї до настави.