БЕОҐРАД – Гражданє ширцом Сербиї на нєдзелю буду мац нагоду окончиц безплатни, превентивни препатрунки у рамикох предлуженя акциї чий циль вчасна дияґностика и промоция превенциї як найефикаснєйшого способу бриґи о здравю, а котру запровадзує Министерство здравя.
Як ше гвари у сообщеню ресорного министерства, препатрунки ше будзе окончовац од 8 по 16 годзин, а шицки гражданє, и тоти котри нє маю здравствене осиґуранє, годни без заказованя терминох окончиц ултразвук абдомену и ПСА, односно специфични антиґен простати котри пренаходзи туморски пременки и окончиц ґинеколоґийни препатрунки.
Попри тим, даєдни здравствени установи котри за тото маю можлївосц, буду окончовац и ЕКҐ препатрунки, мерац уровень цукру у креви и кревов прицисок.
Детальни розпорядок здравствених установох будзе обявени на урядовим сайту Министерства здравя.