СУБОТИЦА/РУСКИ КЕРЕСТУР – На Европским першенстве Шотокан Карате союзу Анамария Няради з Карате-клубу „Русин” з Руского Керестура освоєла перше место у борбох у поєдинєчней конкуренциї у катеґориї кадеткиньох. Европске першенство спомнутого союзу, ткв. „Кохаи-куп”, того року отримане у Суботици од 5. по 7. май, а участвовали коло 1 500 каратисти зоз 16 державох у рижних катеґорийох.
Попри Анамариї, з „Русину” на Европским першенстве у борбох у поєдинєчней конкуренциї у катеґориї кадеткиньох участвовала и Сара Планчак, а на тим змаганю обидва були и членїци кадетскей репрезентациї Шотокан Карате союзу Сербиї. Нярадийова ше поєдинєнчно змагала пияток, Планчакова всоботу, а як членїци репрезентациї внєдзелю.
Каратистох „Русину” и за тото змаганє пририхтал тренер Михал Орос, котри з тей нагоди визначел же уж сам поєдинєчни пласман двох каратисткох на Европске першенство, їх участвованє и у репрезентациї, а окреме єдно освоєне перше место барз вельки успих за нєвельки Карате-клуб як „Русин” и за Руски Керестур.