ВЕРБАС – Вчера, 30. юния, члени русийского културно-уметнїцкого дружтва з Костроми наступели на городскей площи у Вербаше, у рамикох госцованя у Сербиї з меном „Габи любови и дружби”.
Уметнїки з Костроми, єдного з найстарших русийских городох, наступели з хореоґрафиями и музичнима точками солистох и шпивацких ґрупох, а госци ше потрудзели анимировац публику, та у єдней часци програми и публика участовала у хореоґрафиї.
Найвекше нєсподзиванє за публику було же госци з Русиї часц програми виведли и на сербским язику, та Вербащанє могли чуц найкрасши стихи поезиї и сербски народни писнї.
Пребуванє у Вербаше, як и сам концерт, орґанизовали Здруженє сербско-русийского приятельства „Род”, Културни центер Вербас и локална самоуправа, а предсидатель Општини Милан Ґлушац гварел же у планє же би ше тоти два городи и побратимели и ище цеснєйше сотрудзовали у наиходзацим периодзе.