КУЛА/РУСКИ КЕРЕСТУР – Вовторок, 23. октобра, у Велькей сали Општини Кула предсидатель Општини Кула Велибор Милоїчич и директор фармацеутскей компаниї „Galen Pharm” Велько Джалетович подписали контракт о закупу просторийох дакедишнїх державних апатикох у населєних местох Општини Кула – Кули, Червинки, Сивцу, Липару, Крущичу и Руским Керестуре, з котрим ше закупец обовязал же апатики почню з роботу найпознєйше за мешац.
Як наглашел закупец, за вибор занятих у апатикох предносц буду мац фармацеути и фармацеутски технїчаре котри були заняти у державних апатикох у рамикох Дому здравя Кула, а котри з тоту одлуку остали технолоґийни звишок.
Починаюци од 1. фебруара идуцого року, апатики годни видавац и лїки з позитивней лїстини РФЗО, тє. лїки на белави рецепт, цо окреме важне жительом Крущичу и Липару, дзе тераз нєт анї єдна апатика.