Бавиме ше, читаме, одпочиваме…

автор фес/сас,
1.3k Опатрене

Ребека и Хана Семаново, шестри з Руского Керестура тих дньох у баби и дїда у Коцуре, и гваря же им там нїґда нє допито, бо там маю пайташки, а и родзину, та треба шицких обисц. Нєдавно ше врацели з моря, а упечатки ище швижи:

– Були зме у Горватскей, у Цриквеници и було нам барз крашнє. Мнє ше найбаржей пачело кед зме були у Аквариюму, бо там єст барз вельо морски животинї, риби, а крокодил и коритнявка найкрасши… Лїзали зме и „мрак”сладоляд, од хторого нам були и ґамби и язик барз чарни, та зме страшели маму и тату… – одушевена дзевецрочна Хана.

Єй шестра Ребека закончела шесту класу и гвари же лєдво чекала пойсц на морйо. И єй ше там барз пачело окреме атмосфера пре побиду горватскей фодбалскей репрезентациї у Русиї, та приповеда же Цриквеница була як на Нови рок, ошвицена з огньометами и ракетами у воздуху, а понеже їх апартман бул у центре, уживали у вешелю людзох у тим поморским месце.

Ребека люби и читац кнїжки, а ниа, цо препоручує:

 – Кнїжку „Мой сладки живот” од Мариї Жежель сом раз-два „прелїґла”, а вец сом пречитала и „Онлайн дзивка” од Зои Саґ, перше перу часц, вец другу, та и трецу. Жаль ми лєм же нєт ище даєдна и лєдво чекам нови предлуженя – гвари Ребека.

– Мария Горняк зоз Дюрдьова закончела седму класу и єдна є з найактивнєйших читателькох кнїжкох у школскей библиотки. Одкеди тирва одпочивок уж пречитала три кнїжки: „Пребачце же бим дахто да ме люби” Юхана Тидела, „Дзивки оставаю до позно” и „Розплакани дзивки” Джеклин Вилсон. Тих дньох почала читац и штварту хтора о одрстаню, а наслов – „Ана и французки поцилунок” Стефани Паркинс. Препоручує их шицким, окреме тинейджером єй рокох котри любя кнїжки на любовни теми, алє и франти.

– Найволїм тинейджерски приповедки, бо ше у нїх случує шицко тото през цо и сама преходзим. Любим читац, бо вец о тим роздумуєм – гвари Мария. Окрем кнїжкох, дружи ше и з пайташками, була у „Петроленду” у Бачким Петровцу, а любела би того лєта пойсц и на морйо. Потамаль будзе ходзиц на хор, солфедьо и клавир, бо у авґусту поклада за штварту класу Музичней школи.

Мария и того лєта помага родичом на полю коло продукциї капусти и у загради коло желєняви и овоцох. У фамелиярней роботи участвую и єй шестринїца Єлена и братняк Владимир, та робота злєгка идзе кед ше у роботи и франтує…

Найволї читац у мегким „лейзи-беґу”  (фото М. Горняк)

ПОВЯЗАНИ ТЕКСТИ