РУСКИ КЕРЕСТУР – Дзеци зоз керестурскей Дзецинскей заградки „Цицибан”, хтора спада до ПУ „Бамби” з Кули, вчера означели Дзень защити животного штредку з традицийним маскенбалом. Уручели и подзекованє двом оцом – Милейови Зеличови и Ґоранови Петковичови за оправянє їх бавискох у парку.
О защити животного штредку оводаше прикладно возросту у своїх воспитних ґрупох учели цали прешли тидзень, а заєднїцки виписали и плакати з еколоґийнима порученями и заквачели их вчера на капуру своєй оводи.
Пред вечаром з традицийним маскенбалом у найрижнороднєйших маскох висликовали ше у дворе оводи, а потим ше прешпацирали през центер валала док их провадзели фамилия и велї други Керестурци.
Шпацир ше закончел у дзецинским парку дзе учителька Емилка Костич у мено „Бамбия” двом спомнутим оцом хтори маю дзеци у тей установи подзековала за їх самоинициятивну помоц, а подзекованя им уручели їх дзеци.
Ґрупа предшколских и младших дзецох потим присутним вишпивали даскельо шпиванки зоз еколоґийнима порученями.