КУЛА − Општина Кула розписала Явну поволанку реґистрованим польопривредним ґаздовством на териториї општини Кула котри заинтересовани за краткотирваци польопривредни кредити на период од 12 мешаци у „ОТП” банки, а за котри Општина субвенционує цалосну камату.
За тоту Явну поволанку Општина Кула у буджету за 2018. рок видвоєла 5 милиони динари за финансованє каматох, минимални винос кредиту може буц 100 000 динари, а максимални єден милион. Явна поволанка отворена покля єст средства, а найпознєйше по 31. децембер 2018. року
Текст Явней поволанки и прияву мож превжац на сайту Општини www.kula.rs, а попри прияви потребне потвердзенє о активним статусу ґаздовства и потвердзенє о вимирених порцийних обовязкох.