НОВИ САД – Предсидатль Покраїнскей влади Иґор Мирович и директор Управи за капитални укладаня АП Войводини Неделько Ковачевич представительом локалних самоуправох и здравствених установох вчера у Покраїнскей влади уручели контракти о доставаню безповратних средствох за финансованє и софинансованє проєктох на основи конкурованя до Управи за капитални укладаня.
Вредносц шицких контрактох за 68 рижни проєкти у 39 войводянских општинох и городох, та за 11 здравствени институциї прейґ милиярду 404 000 динари.
Општина Шид достанє безповратни средства на основи двох конкурсох – за проєкти хтори доприноша злєпшованю дїловней и инвестицийней клими и за розвой, очуванє, унапредзенє и защиту културних и националних окремносцох у локалним штредку.
За проєкти з обласци подмирйованя з воду и защити водох средства достаню општини Кула, Вербас и Город Сримска Митровица, а вербаска општина и за проєкти з обласци предшколского и основношколского образованя.
Город Сримска Митровица достанє средства и за проєкти з обласци транспорту, як и Нови Сад, док Општина Жабель за унапредзенє спорту.
Предсидатель Покраїнскей влади Иґор Мирович з тей нагоди здогаднул и же за остатнї шейсц мешаци Покраїнска влада скоро шицким 45 општином у Войводини видвоєла 1,8 милиярди динари.
