РУСКИ КЕРЕСТУР – Всоботу, 11. марца, у Велькей сали Дому култури у Руским Керестуре його Младежска ґрупа Драмского студия „АРТ” премиєрно одбавела представу „Боинґ-Боинґ”, хтору по тексту Марка Камолетия режирал Владимир Надь Ачим.
Слово о комедиї ситуациї, у хторей млади Бернард (Себастиян Няради) водзи трояки живот, бо ма три заручнїци стюардеси – Американку Жанету (Адриана Надь), Французкиню Жаклину (Ребека Планчак) и Шпаньолку Жудиту (Марина Роман), котри нє знаю єдна за другу, а вон лукаво комбинує час же би ше каждей пошвецел.
У спреводзки Бернардови помага служнїца Берта (Леонтина Штефанко), а ту и Роберт (Андрей Орос), товариш котри ше случайно зявел у хвильки замервйованя тей ситуациї, хтора ше заш лєм закончує кельо-тельо щешлїво за Бернарда.
Представа динамична, зоз швидкима пременками сценох и тиж швидким, нєсподзиваюцим законченьом, до хторого режисер уруцел и актуалну тему тероризму, медзитим, представа з тим нє страцела на своєй комичносци.
Мож повесц же то єдна з лєпших младежских представох за остатнї роки, за цо заслужни насампредз добри ґлумци. Вельке интересованє за представу було обачиц по преполней сали, а на основи моцних аплаузох и шмиху хтори виволала тота комедия, воно було и оправдане.
Окрем спомнутих ґлумцох и режисера, у витвореню представи участвую и суфлерка Кристина Афич, костимоґрафка Таня Орос, тон-майстор Владимир Бесерменї, майстор шветла Желько Пашо и сценски роботнїк Дюра Хома.
Шлїдуюце виводзенє тей представи будзе на тогорочним Драмским мемориялє, на пияток, 24. марца.