НОВИ САД – З промоцию студентох котри витворели вершински резултати на европских и шветових змаганьох и з додзельованьом наградох найлєпшим студентом Универзитету у Новим Садзе (УНС) у школским 2016/2017. року, на Ректорату новосадского универзитету вчера, 16. октобра, шветочно означени початок нового школского рока, а медзи найлєпшима наградзенима студентами УНС и Борис Барна з Руского Керестура, з Факултету спорту и физичного воспитаня.
Борис Барна под час основних студийох мал штредню оцену 9,58, и з тей нагоди гварел же му нє було чежко дойсц до того успиху, гоч нє було лєгко, бо було вельо одреканя, алє же шицко робел з вельку любову и уживаньом. Як гварел, награда хтору вчера достал за ньго „витор до хрибта” и порушовач за дальши успихи на Факултету. Барна медзи 14 найлєпшима студентами УНС.
Факултет спорту и физичного воспитаня УНС ше перши раз зявел и на Шанґайскей ранґ–лїстини универзитетох и медзи 300 є найлєпшима у швеце у обласци спорту.
На предлог факултетох, Сенат УНС додзелєл 1 225 награди найлєпшим студентом у розличних катеґорийох – найлєпшому студентови цалого УНС, найлєпшим студентом факултетох, позарядово награди за закончени студиї и за успих под час студийох, награди за високи резултати на европских и шветових змаганьох, награди за фахово роботи и награди „Александар Саша Попович” и „Милева Марич Айнштайн”.