Брилиянтни успих Коцурцох

автор злк
1.2k Опатрене

Упартосц коцурских фодбалерох ше на концу виплацела, понеже ше остатнї два сезони ФК „Искра” намагала войсц до лиґи у котрей єй и место, а то Подручна лиґа.

 У сезони 2015-2016. барз єй мало хибело же би тот свой циль и виполнєла и гоч Искра и теди була перша у векшей часци першенства, мала „кикс” и нєришени резултат у Савиним Селу процив Будучносци котри вихасновала Бачка зоз Дюрдьова и на концу вона освоєла перше место, а Искра остала друга

После розчарованя у прешлей сезони зоз Искри пошли даскельо бавяче, тренер Здравко Бабич дал задзекованє, а екипа була составена зоз бавячох з Коцура, котри иншак нє доставали вельо простору за бависко у прешлей сезони. После Бабичового задзекованя приведзени нови тренер – Зоран Ґолубович зоз Вербасу. Руководство, на чолє зоз Виктором Ґрешаком, пред початком новей сезони дало колективне задзекованє, а за нового предсидателя вибрани Радисав Сталевич.

УСПИХ ПОСЦИГНУТИ ЗОЗ ШЕРЦОМ

Нови предсидатель клубу, Сталевич, коло себе позберал особи до котрих мал довирия и котри искусни длугорочни спортски роботнїки. Початок першенства у новоформованей лиґи Бачка Тополя–Мали Идьош–Вербас–Бечей нє бул успишни понеже Искра такой у першим колу страцела у Томиславцох од истоменовей екипи. Од теди, ишло ше поступнє. Перши циль бул стабилизовац екипу, а перши крочай у тим дац задзекованє тренерови Ґолубовичови и врациц Здравка Бабича котри позна наших фодбалерох и принєше стабилносц екипи. Позитивна атмосфера вплївовала нє лєм на бавячох, алє и на шицких любительох фодбалу у Коцуре. Искрово бавяче почали победзовац, а бавяче котри у сезони пред тоту були у другим планє, помали указали же бавиц зоз шерцом за свой клуб дакеди значнєйше и од фодбалского мена на паперу, та аж можебуц и висшого квалитету.

Побида за побиду и Искра на концу єшеньскей часци першенство закончела на першим месце на таблїчки зоз шейсцома побидама, двома нєришенима змаганями, єдним пораженьом у першим колу и вкупно 20 бодами.

Розуми ше же зоз таку ситуацию приходзи и амбиция же би ше тераз конєчно освоєло и тото перше место. Пририхтованя почали озбильно, а на полусезони змоцнєни бул и бавяцки кадер, у найвекшей мири зоз врацаньом Срдяна Юшковича. Правда, екипу пре роботу напущел Мирко Живкович, алє го на найлєпши можлїви способ заменєл млади Предраґ Дрляча. Потим до екипи пришол и Петар Везмар, барз добри фодбалер котри, на жаль, нє сцигол указац шицко цо зна на терену.

ВИСОКИ ЦИЛЬ НА ТЕРЕНУ И КОЛО ТЕРЕНА

Окрем формованя екипи котра би и конєц сезони дочекала на першим месце, нове руководство на чолє зоз предсидательом Радисавом Сталевичом жадало охабиц и шлїд котри будзе тирвац вельо длужей од самого уходу до Подручней лиґи. Тот шлїд то була робота на проєкту комплетного реновованя Искрового стадиона. Почало ше зоз меншима роботами, як цо то ушорйованє фасади, мурика, дражкох, садзеня квеца, а финалне и тото найвекше було будованє нових трибинох зоз закрицом. Гоч було вельо скептичних, котри були прешвечени же ше шицко закончи на приповедкох у карчми, тото цо було зарисоване почало ше витворйовац кед баґер ЯКП „Комуналєц” цалком звалєл стари трибини, кед вецей нє могло назадок, було очиглядне же трибини буду направени.

До ярнєй часци сезони Искра вошла зоз комплетно нову инфраструктуру. Такой у першим колу ярнєй часци Искра ше вимсцела Томиславцом за єдине пораженє и победзела их зоз 2:1. Зоз кажду нову побиду прицаговали и вше вецей публики на стадион и то нє лєм коцурскей, алє ше случовало же Искра на даєдних змаганьох и у госцох мала вецей своєй публики як домашнї фодбалере.

Два змаганя були преламни за Искру, а то госцованє у Савинм Селу, пре прешлорочни „кикс” и коло после того, дерби зоз екипу котра ше указала як после Искри найлєпша у лиґи, а то Войводина зоз Бачкого Ґрадишта. Таку потримовку навиячох, и у Савиним Селу, а окреме у Коцуре процив Войводини, кед трибини були цесни же би прияли шицких котри пришли на змаганє нє паметаю анї найстарши любителє фодбалу у Коцуре. Обидва змаганя закончени зоз резултатом 2:2 и преслава шампионскей титули помали могла почац.

Од змаганя зоз Войводину по нєшка ище вше Искра главна тема бешеди у карчмох, у байбернї и вшадзи дзе ше людзе зазберую у Коцуре. Наздавайме ше же так будзе и од єшенї – же ентузиязем и любов ґу фодбалу у екипи Искри нє щезню.

Iskra 24 3

У СЕЗОНИ ЛЄМ ЄДНО СТРАЦЕНЕ ЗМАГАНЄ

Искра у сезони 2016-2017. рок одбавела вкупно 18 змаганя. Зазначела 13 побиди, 4 нєришени змаганя, дожила лєм єдно пораженє и освоєла 43 боди. Ґол розлика тиж найлєпша у лиґи: +54 – Искра дала 70 ґоли, а прияла 16.

Найвецей змаганя одбавели Марян Малацко котри одбавел шицки 18 змаганя без вименки (1620 минути), а Дамян Ґубаш одбавел 17 змаганя (1530 минути). Марян Малацко и найлєпши ґолґетер зоз 15 датим ґолами, Дарко Николич дал 14, Дамян Ґубаш 11, Зоран Сердар 10, Тони Иван 6, Дамир Ґубаш 4, Атила Ери 3, Златко Колєсар 2, Неманя Шкорич 2, Душан Ваяґич, Никола Барович и Предраґ Дрляча дали по 1 ґол.

ВИСШИ РАНҐ ЗМАГАНЯ ЗОЗ ТРЕНЕРОМ БАБИЧОМ

Остатнїраз Искра до Подручней лиґи вошла у сезони 2006-2007. рок, односно пред точно 10 роками. Шлїдуюцого року, пре реорґанизацию лиґи, випадла и требало 10 роки же би ше врацела там дзе єй и место.

Тренер Здравко Бабич єдини коцурски тренер котри уведол Искру до висшого ранґу, понеже потераз то були тренере котри до Искри приведзени з других местох. Тиж так, екипа под його „дириґентску палїцу” у остатнїх двох сезонох дожила лєм єдно пораженє и то у сезони 2015-2016. у Радичевичу кед од Младосци страцела зоз 3:1. На домашнїм терену у остатнїх двох сезонох Здравко Бабич, як тренер Искри, зазначел лєм єден нєришени резултат, праве тот процив Войводини зоз Бачкого Ґрадишта, а окрем того змаганя Искра шицки победзела.

ПОВЯЗАНИ ТЕКСТИ