ДЮРДЬОВ – Єшеньске оранє, односно шатва жита и ярцу тераз найактуалнєйши польопривредни роботи у дюрдьовским хотаре, а парастом у тим помага и красна хвиля, та плановане вироятно на час будзе и поробене.
Як гваря фаховци, оптимални час за шатву жита по 25. октобер, а гоч ше влонї пожнєло зоз шатву пре вельки и части дижджи и жита було менєй, польопривреднїки у Дюрдьове були задовольни, понеже други польопривредни култури барз мало плацели пре тогорочну вельку сушу у дюрдьовским, односно хотарох жабельскей општини.
Прето нагаднуте же будзе пошате вецей жита як скорей, а мєнєй сої, хтора остатнї час була найзаступенша култура у тим хотаре.
Услуга ораня у Дюрдьове кошта од 5 000-6 000 динари по ланцу, а шаца од 1 800 до 2 000 динари.