Заєднїца ма розвите чувство националного идентитету
Того року дзешати раз означуєме Националне швето Руснацох. То сам по себе красни ювилей, хтори тераз уж ясне потвердзенє же Дзень Руснацох нє даяки дочасови експеримент, алє постава централна подїя руского националного календару. Националне швето Руснацох кажди рок ознова потвердзує же руска заєднїца у Сербиї ма розвите чувство националного идентитету, и же ма моци, виталносци и сцелосци позберац ше и мобилизовац коло заєднїцкей идеї. Окрем же то нагода же бизме ше стретли у шветочней атмосфери и кажди раз нєзвичайним, за велїх з нас, новим амбиєнту, Националне швето Руснацох и законченє, и коруна цалорочней роботи Националного совиту Руснацох, його одборох и роботних целох, шицких руских институцийох и културних дружтвох, кед можеме спатриц яки бул рок за нами, и цо пред нами у року хтори праве почал.
Дзекуюци велькому анґажованю членства Националного совиту и його целох, наших орґанизацийох, дружтвох и поєдинцох на терену, у 2016. року знова маме руски оддзелєня и у Коцуре, и у Дюрдьове. Маме право буц задовольни же зме сполнєли тото цо зме преглашели за приоритет цалей рускей заєднїци, предусловиє шицких условийох же бизме ше отримали и розвивали на тих просторох. Медзитим, то робота хтора нє закончена, анї нє будзе мац конєц кед сцеме же би було Руснацох. Уж такой по Националним швету Руснацох, знова мушиме допрец до шлїдуюцей ґенерациї родичох и дзецох, представиц им шицки предносци образованя на мацеринским язику и прешвечиц их же су нє сами, алє маю потримовку цалей заєднїци и шицких инструментох хтори нам права и закони даваю. Национални совит нєпреривно у рамикох своїх можлївосцох преширює и преглїбює тоти рамики, з намиру же би кажди наш оводарец, школяр и студент доставали стипендию, лєбо даяку иншаку потримовку. Медзитим, треба наглашиц же нїхто з тим же є Руснак, лєбо Рускиня, нє риши каждодньово бриґи з хторима ше нєшка шицки стретаме. Алє исто так, буц Руснак, лєбо Рускиня анї му нє одмогнє у борби за лєпши и достоїнственши живот. Буц Руснак, лєбо Рускиня то богатство иншакей файти.
За предходни дзевец роки, Централну шветочносц отримовали зме у вельких городох и малих валалох, у старих руских штредкох и местох, дзе ше наша заєднїца лєм нєдавно почала орґанизовац. Руски живот у каждим з тих штредкох ма свойо специфичносци и характеристични проблеми. Задаток Националного совиту же би помогнул у ришованю тих проблемох, а источашнє уважовал шицки специфичносци хтори часц власного идентитета каждого руского штредку. Вироятно найдалєкосяжнєйши резултати у 2016. року Национални совит витворел у обласци звекшованя руского маєтку. Купена хижа у Новим Садзе дзе будзе шедзиско даєдней нашей централней институциї. Окрем же зме практично удвостручели маєток у штредзиску Покраїни, у будучносци так зашпоруєме значни пенєж хтори вшелїяк годно мудрейше вихасновац, як за плаценє квартелїни. У Коцуре нарок таки час, дзвери Руского дома уж буду ширцом отворени за шицких учашнїкох нашого културного живота у тим валалє. У Керестуре найстарша хижа, материялни памятнїк на нашу прешлосц, конєчно припада шицким Руснацом. Застановиц єй дальше препаданє, реконструовац ю по стандардох и предписаньох з обласци защити памятнїкох и обдумац єй намену нє будзе лєгка, анї туня робота, алє тераз є у наших рукох. Прето, кед ше нам нє уда, нїхто други нам вецей нє будзе виновати.
Каждому з тих поцагох и одлукох можебуц мож дацо пригвариц, же могло инше, лєбо иншак. На словох, вироятно и могло. Медзитим, политика, та и тота национална хтору нам зверели водзиц закон и дзека руских гласачох, водзи ше у реалних, а нє у идеалних условийох. Вшелїяк же лєгчейша драга чекац же би ше витворели идеални условия, а потамаль най живот преходзи коло нас. Вельо чежше превжац одвичательносц, ризиковац, створиц себе нагоду и вихасновац ю, алє то єдина права драга. Национални совит идзе по нєй – шицки спомнути одлуки приношел з прешвечлїву векшину.
Кед єст добрей дзеки, кед почитуєме єдни других, кед ше водзи конструктивни диялоґ и чера идеї, вец муши буц и резултати. З тим наздаваньом шицким Руснацом и Рускиньом, и шицким добрим людзом з хторима жиєме и робиме, винчуєм Националне швето Руснацох.
Славко Рац
Националне швето Руснацох, а у Бикич Долу
Вельке число Русинох з околїска Бардейова и Ґорлицох штредком 19. вику рушело на Фрушку гору, як гуторели, фрушкогорски Карпати, глєдац лєпши живот. Лєпши живот з часом нашли, алє ше национално и вирски злучели зоз старобивателями и як Русини, страцели.
Остала лєм єдна менша громада збита до найзаходнєйшого долу на Фрушкей гори, такволаного руского и постали ядро нєшкайшому Бикич Долу. Без приходу тих Русинох нє було би анї нєшкайшого Бикич Долу.
У паметаню старобивательох зоз Привиней Глави, односно як би Бикичанє поведли зоз Пернявора, зазначене же то народ побожни, чесни и роботни. То потвердзую и факти же накадзи дакус економски змоцнєли, збудовали церкву 1904, и школу 1940. року.
Приход учителя Ковача 1941. зохабел глїбоки шлїди на Бикичаньох, шлїди котри ше и нєшка чувствує. КПД „Иван Котляревски” основане на його инициятиву 1946. року и за кратки час постало барз активне и успишне. Робело по 1975. рок, одтеди та по 2008. була пауза, гоч го ше пробовало обновиц 1991. и 1997. року.
Праве 2008. року позберали ше даскельо Бикичанє з представителями КПД „Дюра Киш” зоз Шиду же би ше обновело културни живот у валалє. То ше нам и поспишело, так же зме видзели же маме власни моци ище вецей поробиц як самостойне дружтво. Официйно то було 2011. року, гоч зме самостойно виступали уж од децембра 2009. року. Формовани два фолклорни ґрупи, мишана шпивацка, дзивоцка шпивацка ґрупа, спортска секция и драмска.
Маме коло 50 активних членох, виступаме на фестивалох у жеми и иножемстве и постали зме познати як ношителє очуваня националного индетитета Руснацох у Сриме.
За мнє, особнє, преслава Националного швета Руснацох у Бикич Долу представя коруну нашей дотерашнєй роботи. Предсидатель Дружтва сом од самого початку його обновеней роботи, перше як предсидатель подружнїци „Дюри Киш” за Бикич 2008, а потим и як самостойного Дружтва „Иван Котляревски” 2011. року. Упознати сом зоз шицкима почежкосцами котри зме прешли же бизме дошли по стан яки маме нєшка.
Тиж так за мнє вельки успих же на мою инициятиву почало повязованє зоз старим крайом. Вязи знова возпоставени и успишно ше розвиваю, цо потвердзую и делеґациї котри приду на преславу.
Думам же успих шицких нас, Бикичаньох, будзе кед ше 14. януара у Бикич Долу позбераю Руснаци зоз шицких наших местох и иножемства перше на промоциї Моноґрафиї о Бикичу, вец на Служби у церкви, на етно столох и виставох у Доме култури и на концу на Шветочней академиї у Шидзе и кед почувствуєме дух заєднїцтва же зме свойо.
До преслави уключени шицки, окреме млади котрим тота преслава змоцнї свидомосц о националним идентитету и же би були пишни на свойо походзенє.
Думам же барз значна и помоц и потримовка Националного совиту Руснацох, як и Заводу за културу войводянских Руснацох у пририхтованю и орґанизованю преслави, а при наших людзох змоцнї довириє до тих наших институцийох.
Тиж барз значна велька помоц локалней самоуправи, односно Општини Шид коло реновираня Дома култури у Бикичу.
И на концу, чувствуєм вельку одвичательносц и чесц же участвуєм у тей преслави вєдно зоз сотруднїками, односно Бикичанями, бо ше до орґанизованя и роботи уключел цали валал же би ше успишно, радосно и гордо, так як лєм то Бикичанє знаю, означело централну преславу Националного швета Руснацох Сербиї, а у Бикич Долу.
Деян Бобаль