После новинарскей роботи у руских медийох, Танита Ходак з Коцура ше планує врациц на драгу хтора водзи ґу кариєри  ґрафичного дизайнера, цо єй и фах. Вше любела фотоґрафию як способ чуваня моментох лапених у хвильки часу. О тим озбильнєйше учела на факултету, а ище озбильнєйше кед купела DSLR фотоапарат. Гвари же ше пре роботу хтору робела, нє досц и так як би вона сцела, пошвецела фотоґрафиї, алє, планує фотоґрафию претвориц до гобия  –  сликовац за свою душу (як цо з початку и було), а нє фотоґрафовац  лєм за роботу. Прицагує ю макро фотоґрафия, односно кед мали деталї у центру уваги. Найволї кед сликує природу, квице, древа… а, як гвари, нїґда нє любела фотоґрафовац людзох, гоч и то пробовала. Припознава же лєдво чека момент кед ознова почувствує потребу пойсц на цали дзень призначовац фотоґрафиї без даякого циля, без важносци, роздумованя же чи дому принєше тисяч фотки, чи анї єдну, алє лєм просто уживац у фотоґрафованю. Нє змагала ше и нє планує ше змагац, нє ма амбициї же би то постала єй примарна робота, алє, як гвари, до конца, хто зна…