НОВИ САД – У Руским културним центру у Новим Садзе пияток, 25. авґуста, отримани Актив наставнїкох руского язика, хторого водзели у мено Дружтва за руски язик, литературу и културу Ирина Папуґа и Мария Самарджич зоз Дюрдьова.
У першей часци проф. др Юлиян Рамач отримал роботню и вежби з руского язика и литератури на унапредзованю знаня, дзекуюци и драгоциним искуством професорки Меланиї Сабадош.
У другей часци схадзки, учашнїки зоз Нового Саду, Нового Орахова, Дюрдьова, Вербасу, Руского Керестура и Петровцох ше оглядли на змаганя з руского язика и язичней култури и Стретнуца руских школох. Гварене же нам важни кажди школяр и кажде место, же було красне число змагательох, а за похвалу же Руснаци маю змаганє и зоз виборней настави. Стретнуце руских школох було у Бикичу о Шиду у Сриме, а шлїдуюце, 24. по шоре, требало би буц Стретнуце наставнїкох руского и словацкого язика, а 25. як ювилейне ше планує у Новим Орахове и Бачкей Тополї. Предложене же би ше у наступним чаше розпатрело можлївосц орґанизованя Стретнуца и у Петровцох.
У огляднуцу на мастер роботи наставнїкох/професорох, Сенка Бенчик поучно бешедовала о єй другей мастер роботи о гунґаризмох у руским язику, як и о подобносцох у сербским, мадярским и руским язику. Ана Мария Рац, Оля Яковлєв и Ванеса Медєши кратко винєсли искуства з обласцох свойого интересованя, а Ирина Папуґа констатовала же добре же маме фаховцох у рижних обласцох виучованя язика.
– Маме предлуженє едукованя по руски и у штреднєй школи у Новим Садзе, дзе приходза велї нашо школяре и будуци студенти, а за лєпшу роботу треба вихасновац и сотруднїцтво з вироучителями, за цо єст добрей дзеки – заключела Папуґова.
Таки стретнуца наставнїкох барз хасновити за черанку искуствох и едукацию, заключене на сходзе у Руским културним центру.
