ВЕРБАС – З нагоди наиходзацого швета, Велькей ноци, школяре хтори виучую руски язик при учительки Славици Мали и українски язик при учительки Олї Станков, всоботу у просторийох КПД „Карпати” фарбели писанки.
На тоту роботню пришли вецей як 40-еро дзеци рижних возростох. После фарбеня школяре пробовали чийо вайцо найтвардейше, а учителька Малийова им орґанизовала и облїванє, понеже о тим обичаю учели на годзинох у школи.
Школяре поприходзели зоз ОШ „Братство єдинство”, „Светозар Милетич”, „20. октобер”, а дзепоєдни з нїх вчера, на Квитну нєдзелю, до вербаских парохийох пришли по багнїтки.
