СВИДНЇК (СЛОВАЦКА)/ВЕРБАС – Члени КПД „Карпати“ и делеґация вербаскей општини од 26. по 28. май були у нащиви Свиднїку, у Словацкей, под час Пиятого Фестивалу русинскей култури. Аматере „Карпатох” мали два наступи, а чолнїки локалней самоуправи з домашнїма бешедовали о сотруднїцтве двох општинох.
У Свиднїку були Мишана шпивацка ґрупа КПД „Карпати“, представителє руководительства Дружтва, як и скулптор з Вербасу, член „Карпатох” Милорад Правуляц, а у делеґациї Општини Вербас були предсидатель Општини Вербас Милан Ґлушац, його заменїца Миляна Штулич и член Општинскей ради Ґоран Пейович.
Шицких представительох з вербаскей општини пияток, 26. мая, урядово приял городоначалнїк Свиднїку Ян Голодняк, а после приєму наступела Мишана шпивацка ґрупа КПД „Карпати“. У Доме култури у Свиднїку була отворена и вистава роботох скулптора Милорада Правульца, хтора ище тирва.
Всоботу, 27. мая, Мишана шпивацка ґрупа „Карпатох“ мала петнацминутови наступ у амфитеатре на главней часци програми Русинского фестивалу.
Вербащанє участвовали и у маратону хтори у тот час орґанизовани, та нащивели и познати верх у тим краю Словацкей – Чарну Гору.
