Вечар виведзена комедия „Тенор на пожичку”

автор мар
878 Опатрене

РУСКИ КЕРЕСТУР – У Велькей сали Дома култури Руски Керестур, вчера 11. децембра одбавена професийна представа Народного театру зоз Зомбору, комедия Кена Лудвиґа „Тенор на пожичку”, за котру режию подписує Оливера Дьордєвич.

Публика мала нагоду провадзиц професийну комедию, дзе ше на сцени зоз одличну сценоґрафию зменюю осмеро ґлумци. У представи ґлумя Давид Тасич Даф як Сондерс, Нинослав Дьордєвич як Тито Мерели тенор пре котрого ше розвива цали заплєт.

На перши попатрунок збунєтого, а заш лєм одлучного Макса ґлуми Александар Ристоски, улогу Мариї, Марелийовей супруги бавела Милияна Макевич, Джулиї, Биляна Кескенович, а Даяни, Ваня Ненадич. Даница Ґрубачки ґлумела младу Меґи, а Неманя Бакич бул послуга у готелским апартману котри попри тим мал вельке жаданє постац оперски шпивач.

За сценоґрафию була задлужена Диана Радосавлєвич Милович, за костими Биляна Ґрґур, а корепетитор Аґота Виткаи Кучера. Инспициєнт Зоран Вучкович, а суфлер Нинослав Вранич.

Представа реализована з потримовку Општини Кула, як у Руским Керестуре, так и у другим местох општини.

ПОВЯЗАНИ ТЕКСТИ