БЕОҐРАД – Министерство державней управи и локалней самоуправи требало би розписац виберанки за нови зволаня националних совитох националних меншинох концом авґуста, поведзене на схадзки Републичней виберанковей комисиї.
Члени Комисиї одлучели же ше гласацки лїстки и други виберанкови материял будзе друковац у Службеним глашнїку, а принєшена и одлука о порушованю поступку явней набавки за 2,5 милиони динари, котра ше одноши на прекладательни услуги за потреби запровадзованя виберанкох за членох националних совитох.
Порядни виберанки за членох националних совитох националних заєднїцох ше отримує кажди штварти рок, кельо по Закону о националних совитох тирва мандат єдного зволаня националного совиту.
Зоз Законом предписане же ше порядни виберанки за шицки национални совити отримую источашнє.