БЕОҐРАД – Министерство державней управи и локалней самоуправи поволало припаднїкох националних меншинох же би ше благочасово информовали о упису до Окремного виберацкого списку и так вихасовали право же би участвовали на виберанкох за национални совити хтори буду розписани у авґусту.
Помоцнїца министра державней управи и локалней самоуправи Ивана Антич виявела же Министерство почало робиц на пририхтованю подзаконских документох же би ше Закон о националних совитох националних меншинох, чийо вименки и дополнєня прилапени у Народней скуппштини, цо скорей почало у цалосци применьовац.
Закон о националних совитох националних меншинох унапредзени у часци хтора ше одноши на транспарентносц роботи националних совитох, зменшанє прейґмирней политизациї, трошенє буджетних средствох, як и у часци хтора ше одноши на поступок ажурованя податкох у Окремним виберацким списку националней меншини.
– З оглядом же тот рок виберанкови, важне же би нашо гражданє, припаднїки националних меншинох, благочасово були информовани о поступку упису до Окремного виберацкого списку, и так вихасновали свойо право же би участвовали на виберанкох, же ви виберали, односно були вибрани за членох своїх националних совитох – визначела Античова и поволала припаднїкох националних меншинох же би ше уписали до Окремного виберацкого списку.
Вона здогадла же национални совити цела прейґ котрих национални меншини витворюю свойо уставни права у обласци образованя, култури, информованя и службеного хаснованя язика и писма.
Виберанки за национални совити националних меншинох буду розписани у авґусту, а отримани на єшень.