НОВИ САД – Вчера у Заводзе за културу войводянских Руснацох Дружтво за руски язик, литературу и културу отримало схадзку Управного одбору и виберанкову Скупштину Дружтва, а представело и нови виданя.
На Скупштини вибране нове руководство на штиророчни мандат. Предсидатель Скупштини Дружтва и надалєй будзе др Юлиян Рамач. У Надпатраюцим одборе за предсидательку вибрана Мария Канюх Йозанов, хтора економиста по фаху. За предсидательку УО Дружтва вибрана Блаженка Хома Цветкович, а секретарка-заступнїца Дружтва и надалєй будзе Ирина Папуґа.
На схадзки прилапени Финансийни звит, а тиж так и Програма роботи за идуци 2019. рок.
Як визначела Ирина Папуґа, проблеми зоз финансиями исную, алє Дружтво ма своїх вирних донаторох, хтори помагаю друкованє кнїжкох, а тиж так ту и членарина хтору уплацую члени Дружтва.
Присутним представени пейц нови кнїжки, хтори опубликовало Дружтво у тим року. То кнїжка др Михайла Фейси „Бешедуйме по руски/Говоримо русински”, Владимира Сабодайка „Вибрани писнї и проза”, Мишел Парвенски „Русински древени церкви”, хтора обявена двоязично (по руски и по анґлийски). Потим представена кнїжка Миколи М. Кочиша „Писнї и приповедки за дзеци”, як и сликовнїца за предшколски дзеци „У нашим краю птички шпиваю”. Тиж так представене и перше число часопису „Нови мост”, а пошвидко з друку видзе и друге число того мултикултуралного часопису, у котрим обявюю и нашо авторе.
