РУСКИ КЕРЕСТУР − На порядней рочней виберанковей Скупштини Фодбалского клубу (ФК) „Русин” котра отримана вчера вечар у просторийох клубу на їх стадиону на Ярашу, вибране цале нове руководство, а шицки ше зложели же найважнєйши циль остац у лиґи.
На Скупштини за предсидателя єдногласно вибрани Тихомир Медич, котри достал и функцию директора и заступнїка Клубу. На предклад Медича, до нового зволаня Управного одбора вошли Желько Орос котри предлужи окончовац и длужносц заступнїка Клубу, Денис Югик, Денис Гарди, Иван Хома, Иґор Фейди, Златко Саянкович, Александар Будински, Мирко Надь, Коста Кузма котри и технїчни секретар и Юлиян Колошняї котри источашнє и домар на стадиону.
За функцию подпредсидателя були предложени Иґор Фейди и Мирко Надь, а з векшину гласох вибрани Надь. До Надпатраюцого одбору за предсидателя вибрани Ярослав Виславски, а члени Янко Пастернак и Владимир Тиркайла.
Клуб ма намиру сотрудзовац зоз ширшим кругом людзох котри маю дзеку помогнуц, та так орґанизована и Роботна ґрупа, ширши состав сотруднїкох у чиїм составе Владимир Планкош, Владимир Тиркайла, Михал Надь, Михал Канюх котри окончує и функцию касира, Никола Хрин, Янко Пастернак, Вуядин Щекич и Александар Кочиш. Як поведзене, Роботна ґрупа вше отворена за сотруднїцтво зоз новима ентузиястами, та нововибрана Управа поволала младих до истей.
Нововибрани предсидатель клубу Тихомир Медич виявел за Рутенпрес же найважнєйши цилї буду отримац екипу у терашнєй лиґи, а уж наявел и помоцнєня з новима бавячами. Приоритет будзе обезпечиц и финансийни средства як з уровня локалней самоуправи, так и прейґ спонзорствох, понеже ше Клуб у остатнї час стрета зоз финансийнима почежкосцами.
