НОВИ САД – Предсидатель Покраїнскей влади Иґор Мирович и покраїнски секретар за високе образованє и наукововиглєдовацку дїялносц проф. др Зоран Милошевич вчера уручели контракти представительом факултетох, високих школох и студентских центрох з Нового Саду, Суботици, Зренянину, Зомбора, Сримскей Митровици и Кикинди, хтори средства достали на трох конкурсох Покраїнского секретарияту за високе образованє и наукововиглєдовацку дїялносц у 2017. року. Вєдно опредзелєни 48 милиони динари 21-ей установи.
Мирович з тей нагоди виражел задовольство же з представителями високообразовних установох Покраїнска влада витворела успишне сотруднїцтво, наглашююци же тоти средства наменєни за отримованє и опреманє обєктох и чечуци трошки факултетох и високих школох. Средства од Покраїни того року звекшани, та нє мож обчековац подрагшанє трошкох студираня, а дзе можлїве, треба их зменшац, гварел Мирович.
