НОВИ САД – У Музею Войводини, пияток, 21. децембра, отворена 6. Рочна вистава фоторепортерох Нового Саду и Войводини з назву „Обєктивно”, а з нагоди „Фоторепортерского нового року”, хтори ше уж вецей як 50 роки означує у Новим Садзе.
Традицийну виставу фоторепортерох Нового Саду и Войводини отворел Далибор Рожич, член Городскей ради за културу, а присутних привитали Дариюш Сами, висши кустос Музею Войводини, Боривой Миросавлєвич, селектор тогорочней вистави и Дарко Дозет як орґанизатор.
На шестей вистави виложени вецей як шейдзешат фотоґрафиї трицец активних фоторепортерох, авторох, хтори през обєктиви призначую шицко цо ше случує на новосадских улїцох, а медзи нїма и фоторепортерки наших новинох „Руске слово” Вероники Вуячич, як и фоторепортерох хтори робя за други новински хижи у Войводини – „Вечернї новосци”, „Блиц”, „Дневник”, „Мадяр со”, „Зренянински новини” и другима.
Медзи велїма познатима авторами виложени и фотоґрафиї Ярослава Папа, Андрея Папа, Слободана Шушнєвича, Чили Давид, Александра Камасия и других.
Вистава у Ґалериї Музею Войводини (Дунайска 35) тирва по 15. януар.
Тогорочни орґанизаторе вистави фоторепортере „Дневнику”, Фото-асоцияция Войводини, Музей Войводини, НВУ „Мадяр Со”, а виставу ше отримує з потримовку Управи за културу Городу Нови Сад.
