РУСКИ КЕРЕСТУР – Вчера, з добродзечну роботну акцию, очисцена студзенка у Марийовим святилїщу, хтора глїбока 4,46 метери, а вода з нєй послата на биолоґийно-хемийну анализу до Зомбора.
Зоз студзенки з пумпу вицагана вода, вичерпани муль и нєчистота, поумивани и виплокани цегли дезинфиковани зоз вапном и пущена чиста вода. Як познате, у тей студзенки ше пред точно 200 роками, 7. юлия 1817. року, зявели перши чудесни указаня.
Чисценє студзенки, хторе ше окончує углавним раз рочнє, на тот завод реализоване дзекуюци анґажованю и опреми штирох огньогасцох з рускокерестурского Добродзечного огньогасного дружтва (ДОД) на чолє з його предсидательом Михайлом Рацом источашнє и членом Церковного одбору керестурскей парохиї.
Найчежшу роботу у самей студнї окончел Славко Гарди, помагали и Йоаким Рац, Славо Голик, Янко Ковач, домар Янко Олеяр, осемдзешатрочни Стево Хрин, а було и даскельо младих хлапцох и дзивчата.
