НОВИ САД – Школяре у Основней школи „Бранко Радичевич” у Бачинцох нєдавно на годзини руского язика од НВУ „Руске слово” достали на дарунок вельо кнїжки наших авторох, та ше з тей нагоди и висликовали за насловни бок майского числа „Заградки”. О тей подїї вистка на 2. боку найновшого числа часописа, а на истим боку дознаце и о Стретнуцу школярох у Вербаше зоз писательку Меланию Римар, як и о 6. Дньох театру „Владимир Сабо-Дайко” у Коцуре.
З литературней часци часописа видвоюєме приповедки Златки Чижмар и Ксениї Мучаї, писнї Ирини Гарди Ковачевич, Любомира Медєша и Силвестера Д. Макая, як и преложени зоз сербского приповедки Милутина Дюричковича, Весни Видоєвич Ґайович и Бояна Любеновича.
У додатку за наймладших „Мала заградка” стихи писательох Михайла Ковача и Якима Олеяра, а коло нїх вельки илустрациї за вифарбйованє.
Литературни и подобово роботи за тото число послали лєм вредни сотруднїки зоз оводох и школох у Руским Керестуре, Коцуре, Дюрдьове и Новим Садзе.
Мена найуспишнєйших школярох на Медзиокружним змаганю зоз руского язика и на Републичним зоз сербского як нємацеринского язика найдзеце у рубрики „Висти зоз школох” на 18. и 19. боку, а за Забавни боки ше и того мешаца постарала наша сотруднїца, подобова уметнїца Нела Таталович.