Вишло марцовске число „Заградки”

автор рим
747 Опатрене

НОВИ САД – Марцовске число часописа за дзеци „Заградка” таке як и марцовска хвиля: и шнїгу, и подшнїжнїки, тулїпани, и дзеци позалюбйовани… и єден Дїдо Шнїжнїк нарисовани.

Чесц буц на насловним боку мали школяре у коцурскей библиотеки на литературним вечару отриманим з нагоди шветох св. Валентина и св. Трифуна.

Як дзеци у оводи „Дюрдєвак” у Дюрдьове представели свою ПУ „Дзецинство” Жабель, и як школяре у Ґосподїнцох на годзини руского язика означели 21. фебруар – Дзень мацеринского язика, пречитаце у рубрики „Фото памятки”.

За любительох поезиї у найновшим чишлє „Заградки” ярнї стихи Ирини Гарди Ковачевич, Меланиї Павлович, Юлияна Папа, Михайла Катони и Моши Одаловича, а у рубрики „Облачок до швета” представени роман Ґрадимира Стойковича „Робота за хлапцох, а дакеди и за дзивчата”. Приповедку о юшки и когутови за тото число часописа написала Ксения Варґа, а у „Малей заградки” коло кратких писньох о мацери, зомбулькох, тулїпанох и медведзох илустрациї хтори нашо наймладши предплатнїки „Заградки” маю сами повифарбйовац.

Наслови школярских литературних роботох барз рижнородни, а о чим дзеци писали, можеце читац аж на трох бокох у рубрики „Школяре авторе”.

Кеди припитомени перши животинї и як випатра найузша улїца на швеце, дознаце кед сцигнєце по конєц марцовского числа часописа. 

ПОВЯЗАНИ ТЕКСТИ