РУСКИ КЕРЕСТУР – Тогорочне 6. число Християнского часопису „Дзвони” вишло тих дньох у видавательстве керестурскей парохиї св. оца Миколая. Найвецей простору дате означованю 15-рочнїци снованя нашого Апостолского еґзархату.
Зоз преслави тей рочнїци у Водици на Завитни дзень у рубрики „Духовне заренко” виривки з казанї архиепископа Цирила Василя з Риму и привиту нашого владики Георгия Джуджара.
У рубрики „Стереотипи” розпатрени нєбезпеки од фалшивих информацийох поготов хтори чкодза християном, а у „Актуалносцох з вселенскей Церкви” папово порученя з нагоди мундиялу и сходу астрофизичарох.
„Слово живота и шведоченя” предкладаю буц миротворци, „Сримски дожица” з дозу гумору претресаю рижни предрозсудки у духовним живоце наших вирних, а интересантни и запис о єдним Любови у Шантовкох.
Нови „Дзвони” приноша и шведоченє ш. Емилиї Сабадош з нагоди 50-рочнїци єй монашества, о вибеженцох, активносцох Каритасу, младих и Школярским дню у Водици и перших причасцох по наших парохийох и других актуалносцох.
У додатку „Богословска думка” нови предлуженє папового писма о Любови у фамелиї, а у часци преглїбйованя теми Мариї Богородици – видзенє Мариї у Анґликанскей церкви.