НОВИ САД – Тих дньох вишла длуго обчекована капитална кнїжка – штварти том позбераних творох Гавриїла Костельника, у хторей представена Костельникова литературна критика и есеїстика. Том ма наслов „Роса и слунко”, цо источашнє и наслов єдней його кнїжки лирских есейох.
У кнїжки два файти текстох у двох цалосцох – у першей класични огляд о епу „Шмерц Смаил аґи Ченґича” Ивана Мажуранича, котри досц уплївовал на Костельниково розуменє литератури, потим огляд „Шевченко з релиґийно-етичного становиска”, як и цала Костельникова кнїжка „Ламанє душох”, у хторей Костельник пише о романох Володимира Виниченка, поезиї Павла Тичини и Ивана Франка. У тих текстох Костельник препознава и спозорює на опасносци за розвой цивилизациї хтору приноши атеизем. Шлїдзи огляд о славним польским епу „Пан Тадеуш” Адама Мицкиєвича.
У другей цалосци, насловеней „Лирски записи”, обявена Костельникова „Писня Богови”, хтору з українского на руски язик преложел Михал Рамач, потим спомнута „Роса и слунко” и на концу – после шмерци Костельника його новодкрити рукопис кнїжки „Квеце на пристолє”.
Окрем „Писнї Богови, шицки тексти з українского и горватского преложел проф. др Янко Рамач, уводну студию написал академик Юлиян Тамаш, а кнїжка ма и указатель жридлох.
Кнїжку, як дворочни проєкт вєдно обявели НВУ „Руске слово” и Завод за културу войводянских Руснацох, з финансийну допомогу Покраїнского секретарияту за културу и явне информованє.