ДЮРДЬОВ – На швето Рождества Пресвятей Богородици, Малу Матку Божу по юлиянским календаре, у нашей церкви у Дюрдьове вчера, 21. септембра, преславене храмове швето – Кирбай.
Архиєрейску Службу Божу предводзел апостолски еґзарх за грекокатолїкох у Сербиї владика Георгий Джуджар, котри на Служби за священїка пошвецел Данила Задрепка з Дюрдьова. Сослужели священїки з наших парохийох и госци, на Архиєрейскей Служби шпивал домашнї Хор „Розанов”, а Вечаршу Службу Божу служел наш наймладши священїк о. Данил Задрепко
– Нєшка зме вєдно з вами шведкове и народзеня нового священїка. Знаме же Исус Христос, кед сполнєл свою мисию на жеми, кед ше вознєсол на нєбо, жадал же би ше його мисию спашеня людского роду и далєй предлужело на жеми, прето охабел апостолох, ученїкох и нашлїднїкох, же би його дїло учели и преношели аж до конца швета – гаврел у казанї владика Георгий.
На концу Архиєрейскей Служби о. Данил Задрепко шицким присутним дзелєл свой неоєрейски благослов и даровал обращики, як памятку на тоту подїю.
Дюрдьовчанє на Кирбай мали госцох з рижних местох, аж и з иножемства, а як и вше, у Рускей улїци традицийно орґанизована и його вашарска часц, хтора того року пре диждж була скромнєйша. Вчера вечар у вецей кафичох за младих орґанизовани друженя, у хторих даґдзе грали бенди, лєбо ди-джейове пущали музику