РУСКИ КЕРЕСТУР – Покраїнски секретар за спорт и младеж Владимир Батез, стреду 24. октобра, нащивел Спортску галу у Руским Керестуре вєдно зоз домашнїм, предсидательом Општини Кула Велибором Милоїчичом.
У Спортскей гали госцох з Покраїни и Општини дочекали секретар Месней заєднїци (МЗ) Михайло Сабадош, предсидатель Совиту МЗ Владимир Олеяр, управитель Спортскей гали Драґан Ковачевич и директор ЯКП „Руском” Иґор Фейди.
Домашнї представели роботу Спортскей гали, з акцентом на факт же дньово у гали тренираю коло 200 особи, а дотхнута и актуална тема ришованя маєтних одношеньох и зогриваня. Праве о тим, предсидатель Милоїчич потвердзел за Рутенпрес же нєодлуга будзе ришене питанє туторства над Спортску галу, од чого завиши и початок зогриваня на ґаз.
Покраїнски секретар визначел задовольство зоз випатрунком и функционалносцу Спортскей гали у Руским Керестуре. Батез на тот завод нащивел и Спортску галу у Червинки котра би нєодлуга требала буц реконструована, як и новозбудовану Спортску галу у Сивцу.
