На 13. Медзинародним фестивалу славянскей музики у Русиї змагал ше и ансамбл з Нового Саду, у котрим на тамбурки грає Владимир Тот. Фахови жири го як солисту на тамбурки, а окреме його ансамбл, наградзел як лауреата трецого ступня.
На фестивалу котри отримани од 18. по 21. май у Москви, участвовали коло три тисячи учашнїки, котри ше змагали у вецей катеґорийох и на розличних инструментох. Владимир Тот грал зоз ансамблом „Вила” зоз Сербского културного-уметнїцкого дружтва „Железничар” з Нового Саду. Його пецеро колеґове з ансамбла тиж завжали перше, друге и треце место.
Прето з нагоди того госцованя, алє и же би ше представело успих ансамбла „Вила”, Хор ґимназиї „Йован Йованович Змай” з Нового Саду и КУД „Зора” з Ратинґена з Нємецкей, внєдзелю 28. мая на Спенсу отримали Святочни концерт.
Владимир Тот школяр седмей класи Основней школи „Коста Трифкович” у Новим Садзе. На тамбурки почал грац 2012. року у Музичней школи „Йосип Славенски”, а од 2016. року и контрабас у Музичней школи „Исидор Баїч” у Новим Садзе.
– Тамбурку сом такой полюбел. Любел бим ше уписац до штреднєй музичней школи, а потим студирац тамбурку, гоч за ню нєт напрям на анї єдним Универзитету у Сербиї – гварел Владимир Тот.
Владимир з тамбуровим оркестром поряднє участвує на Републичних змаганьох, дзе нє раз завжал перше место, а 2014. року на тим змаганю як солиста завжал перше место.
На Фестивалу уметнїцкей тамбури и подобних инструментох Музичней школи „Йосип Славенски” од 2012. як солиста завжал перше место, а од городу Нового Саду на вецей заводи є наградзовани з Видовданску награду.