ВЕРБАС/КУЛА – Всоботу, 18. марца, кандидат за предсидателя Сербиї, лидер Сербскей радикалней странки (СРС) Воїслав Шешель нащивел Вербас и Кулу, дзе кратшу бешеду перше отримал у центре Кули, а потим и на площи у Вербаше, дзе го дочекали члени СРС и його симпатизере.
Як гварел Шешель, його кампаня нє унапрямена на вельки митинґи, бо лєпше сцигнуц до вецей местох и ґу шицким людзом, а у своїх бешедох у Кули и Вербаше оштро критиковал абсолутну власц Александра Вучича и винєсол свойо видзенє функциї и роботи предсидателя Сербиї.
– Предсидатель Сербиї нє ма и нє шмел би мац комплетну власц. Прето я нїкому нє обецуєм вельки обецунки. Як предсидатель контроловал бим Владу, врацал єй назад закони хтори думам же нєдобри и контроловал роботу уровньох власци – законодавней, вивершней и судскей. Гражданє Сербиї ми можу вериц, бо я єдини котри их нїґда нє спреведнул – гварел кандидат за предсидателя держави Воїслав Шешель.
Тиж оценєл же обчекує и други виберанкови круг, а як виявел, у другим кругу би му найвецей помогнул телевизийни дуел з премиєром Александром Вучичом, на хтори чека уж два роки.
Попри Кули и Вербасу, у своєй предвиберанковей кампанї Воїслав Шешель исти дзень нащивел и Суботицу, Зомбор, Апатин, Оджак, Србобран, Турию и Бечей.