ВЕРБАС – У вербаским ресторану „Чаво” всоботу, 8. децембра, отримани традицийни Вечар приятельох, хтори орґанизує парохийни Каритас з Руского Керестура, а тема Вечара була „Борба процив худобства”.
Водителє вечар почали зоз цитатом Кяри Лубик, сновательки Руху фоколарох, и так шицких присутних привитали и здогадли на єй идеал „же би шицки єдно були”, а госцох було зоз шицких бокох – з Молу, Канїжи, Руского Керестура, Коцура, Сенти, Беоґраду, Нового Саду, Суботици, Зомбора, Панчева, алє и Белґиї, Италиї, Мадярскей и Горватскей.
Окремни госц на Вечаре бул проф. др Луиджино Бруни зоз Италиї, професор политичней економиї на Универзитету Лумза у Риме и позарядови професор економиї и етики на Универзитету София у Лопяну, а од нєдавна и папов совитнїк за мирянох (лаикох), живот и фамелию.
З тей нагоди представена кнїжка др Бруния хтора нєдавно преложена на сербски язик „Рана другого – економия и людски одношеня”, а у тим вечару славя, заєднїцтва, християнскей любови, дзепоєдни госци з присутнима подзелєли свойо животни приповедки.
У интермецу програми наступела Дзивоцка ґрупа „Ариа” зоз Руского Керестура, а по стретнуцу за шицких пририхтани коктел. Вечар з Каритасом вєдно орґанизовали Рух фоколарох и Економия заєднїцтва.
