НОВИ САД – Городоначалнїк Нового Саду Милош Вучевич подписал Европску грамоту о родней ровноправносци на локалним уровню, а на подписованю присуствовали Защитнїца гражданох Городу Нови Сад Марина Попов-Иветич и предсидателька Комисиї за родну ровноправносц Скупштини Городу Миряна Василич.
З тим Город Нови Сад превжал обовязку промововац и запровадзовац правдиву родну ровноправносц. Грамота обдумана за локални и реґионални управи Европи, хтори ше з єй подписованьом явно обовязую же буду шлїдзиц принципи родней ровноправносци и запровадзовац одреднїци предписани з Грамоту у своїх штредкох.
– З подписованьом грамоти о єднакосци женох и хлопох урядово зме припознали политику и идею хтора глїбоко засадзена у нашей роботи – гварел Вучевич.
Защитнїца гражданох Городу Нови Сад Марина Попов-Иветич наглашела же потребне пременїц свидомосц дружтва о подзелєню роботох на хлопски и женски, а при обезпечованю роботи примарни критерий би мал буц квалификация, без огляду на пол, та у тим змислу Грамота барз значна, бо вона ґарантує єднаки права за шицких.
Предсидателька Комисиї за родну ровноправносц Скупштини Городу Миряна Василич наглашела же тото цело у наступних двох рокох ма виробиц Акцийни план, на основи статистичних податкох з вецей обласцох, и привитала родно одвичательне финансованє у шицких сферох, дзе то можлїве.
Город Нови Сад 23. марца того року прилапел Европску грамоту о родней ровноправносци на локалним уровню, як програмну основу за виробок Локалного акцийного плану за родну ровноправносц од 2017. по 2019. року.