БЕОҐРАД – Кандидат владаюцей коалициї на вчерайших предсидательних виберанкох, лидер Сербскей напредней странки (СНС) и актуални предсидатель Влади Сербиї Александар Вучич вчера вечар преглашел побиду на виберанкох за предсидателя держави понеже, як наведол, за ньго гласали вецей як два милиони гласаче, пренєсли вчера вноци нашо и странски медиї.
– Барз сом горди на факт же зме достали огромне довириє, и зоз 3 милиони 700 000 людзох, конєчна оцена же зме достали коло 2 милиони 35 000 гласи – гварел Вучич вчера вноци у першим обрацаню явносци по виберанкох на конференциї за новинарох у шедзиску СНС.
Поручел же будзе предсидатель шицких гражданох и же ше будзе бориц за шицких, без огляду чи гласали за ньго, чи нє.
Премиєр и нововибрани предсидатель Сербиї на вчерайшей конференциї за новинарох тиж виявел же нова Влада будзе формована у наступних двох мешацох.