ТЕРХА: Власци ше уж роками закладаю за розтерхованє польопривреди.
Дакеди каменєц, дакеди суша, а дакеди и мири економскей политики – стварно ю розтерховали. Шицко єй вжали.
МЛЄКО: Збуло ше пред коло 20 роками:
Убегла коза до хлїва ґу крави праве кед ю ґаздиня доєла и так єй гвари:
– Шестричко моя, чула ши же млєко нєодлуга будзе знова драгше? Алє зме на цени!
– Ее-й, козо єдна, и ти ше мишаш до политики! – одмурчала єй крава – Даремна нам слава, покля квашна вода ище вше драгша як млєко.
Копла до жохтара спенєтого млєка и предлужела шпиртац по уж викусаних вигризкох.
ЦЕНИ: Нєупуцени думаю же цени того лєта рошню пре вельки горучави, та очекую же ше то шицко змири на єшень, док сцишню перши мрази.
Дюґа! Нашо цени ше уж нє боя анї од слунка, анї од мразу, та анї од мирох економскей политики. Рошню як сцу!
ХВИЛЯ: Дакеди ше так верело метеоролоґом:
Анї хвиля уж нє така як дакеди була. Кед слухаш проґнозу же наютре будзе красна хвиля – бер амрел, уяш и високи ципели. А кед гваря же будзе мраз, шнїг и лядовица – бер сламяни калап, рекельче и сандали на босо…
КОНЦЕПТ: Гваря же нам уж роками, аж и децениями, хиби концепт аґрарней политики. Прето шицки мири найчастейше обрацени ґу увозу поживи.
Ша увозна пожива нє наша, прекоментаровал гинто єден продукователь. За ню нам нє треба нїяки концепт, анї аґрарна политика.
ЖИМА: Гваря же нам у польопривреди шицко чарне.
Нє будзе то длуго так. Док придзе жима, спаднє шнїг, та ше нараз шицко забилєє.
ОЛЄЙ: Директоре олєярньох зоз цалей держави ше зишли и порадзели же олєй муши подрагшиц, бо фабрики иншак нє маю рахунку робиц.
А дзе же тоти панове були кед землєдїлци контрачели слунечнїк, сою або другу олєйову рошлїну? Им, селяном, ше анї теди анї тераз нїхто нїч нє пита.