Фотоґрафия, моделинґ, друженє… Активносци хтори интересантни, а и популарни. Пре тото и настала цала приповедка з „Уфоткаваньом”. То прави проєкт за тих хтори любя фотоґрафовац, лєбо же би ше их фотоґрафовало, або, можебуц, и єдно и друге.

Ивана Медєши з Руского Керестура на Фейсбуку дознала за Конкурс нєвладовей орґанизациї „Prevent”, хтори спонзоровало Министерство младежи и спорту. Вони додзельовали стипендиї 12 будуцим професийним фотоґрафом, а Ивана, хтора фотоґрафовала и пред тим, жадала унапредзиц свойо знанє, та ше приявела и достала стипендию. Курс тирвал штири мешаци, и у тим чаше, професорка, односно водителька Курса, вибрала штири особи, хтори по єй думаню, маю досц ентузиязма. З нїма ожила „запшети” проєкт – „Уфоткаванє”. Ивана ознова була вибрана.

– З тим проєктом маме єден, лєбо два фото-сешни мешачно на рижних локацийох у Новим Садзе. Потераз зме мали шейсц таки сешни – на твердинї, на штранду, у Кинескей четврти, на Площи шлєбоди, на тунелу Мишелук и у кампусу, а даєдни з темох нам були – „Street Fashion”, „З ошмихом процив жими”, „Осмомарцовски питаня” итд. Єдно таке збуванє углавним тирва годзину и пол, а хто жада, може остац и длужей – гвари Ивана.

Велї особи би сцели мац красни фотки, а нє маю добри фотоапарати, або телефони, а даєдни анї таланту и сцерпеня. Праве ту наступа тота екипа – Ивана, Вукашин Ярич, Зоран Секулич и Милош Спасич. З початку им модели були товарише, браца, шестри итд. Медзитим, з часом ше глас пречул, та ше ґу нїм и други приключели як модели, и так цали проєкт почал роснуц. Модел може буц гоч хто, а єдини услов то полнолїтносц. Нє потребне нїяке предзнанє, а понеже ше роби о фотоґрафиї, а нє о моди, нє потребни анї одредзени пропорциї цела. Нєт официєлне приявйованє моделох. Просто, хто жада, може провадзиц их Фейбук бок, дзе обявюю кеди и дзе шлїдуюце збуванє, и лєм ше зявиц там. Теди треба лєм же би ше явели дакому од членох екипи, од хторих достаню папер хтори потвердзує же фотоґрафове маю допущенє „квачиц” слики на их Фейсбук бок. Потим их члени екипи прешлїдза ґу фотографови хтори их того дня будзе фотоґрафовац.

И Ясна Русковски з Коцура була модел „Уфоткаваня”. Як гвари, одлучела ше опробовац у таким, насампредз пре нове искуство, а и пре красни фотоґрафиї.

– Приємне друженє, нови познанства, нове искуство опрез фотоапарата… Совитовала бим каждому хто може, най пробує таке дацо. Сиґурно ше фино препровадзи, и останю му красни фотоґрафиї як памятка, хтори нє мож направиц зоз своїм телефоном – описала Ясна свойо искуство и додала же пред тим нє мала нїяке искуство у моделинґу.

– Нє було анї важне, бо нам фотоґрафове обяшнєли цо треба робиц, як най ше понамесцаме и шицко далєй було єдноставне. О фотоґрафиї сом дакус слухала на факултету, алє ознова, то нє було нєобходне за участвованє – потолковала Ясна.

Треба наглашиц же ше ґу „Уфоткаваню” можу придружиц и тоти хторих баржей цикави тот бок за фотоапаратом. Приявює ше на исти способ як и модели. Зоз зявйованьом на пред тим обявеним месце, и з тим же ше явя дакому од екипи. Тоти збуваня задармо и за модели, и фотоґрафох. Так же, нєт цо страциц, лєм здобуц.

Єден з моделох бул и Мирко Пап з Нового Саду, а за тот рух дознал од шестринїци хтора фотоґрафує.

– Намагам ше пробовац дацо нове и висц зоз зони комфора. Було цикаве участвовац у таким дачим, кед вежнєме до огляду же ше я анї нє так барз любим сликовац. Медзитим, фотоґрафиї випадли цалком супер, бо фотоґрафове знали свою роботу. Пачело ше ми, та можебуц и повторим дакеди, бо фина атмосфера на знїманю – визначел Мирко.

Фотоґрафиї зоз „Уфоткаваня” мож опатрац на Фейсбук боку и Инстаґрам профилу „Ufotkavanje”.

– Маме план зайсц и до других местох у Войводини, нє останєме лєм у Новим Садзе, прето нас запровадзце, и придружце ше ґу нам – поволала Ивана шицких заинтересованих.

Авторе фотоґрафийох: Ивана Медєши, Вукашин Ярич, Зоран Секулич и Милош Спасич