ВЕРБАС – Всоботу, 3. марца, Културно-просвитне дружтво „Карпати” нащивели госци зоз Свиднїку у Словацкей, хтори на тот завод до Сербиї пришли на Фестивал новей рускей народней шпиванки „Ружова заградка”.
Як з тей нагоди визначел городоначалнїк Свиднїку Ян Голодняк, вецейнїсте сотруднїцтво з нашима людзми тирва уж осем роки. Вон гварел же вельо путує, алє таки красни приклад як вєдно жию Руснаци и Українци у Вербаше, нєт нїґдзе на швеце.
Голодняк визначел и же вше велька чесц кед приду Руснаци зоз Сербиї до Словацкей, же то вше дава важносц подїйом, а новому предсидательови Дружтва Славкови Барановскому пожадал же би бул успишни як и предходни предсидатель др Деян Загорянски. З тей нагоди Дружтву, як знак приятельства, подаровани древорез єдного уметнїка зоз Свиднїку, а шицких присутних поволал на тогорочни Русински фестивал у Свиднїку, хтори з Вербасом и побратимени.
На дарунку подзековали предсидатель и подпредсидатель Дружтва, а и госци зоз Свиднїку достали дарунки. На приємним друженю грал Оркестер „Карпатох”, а були присутни и координаторка за одношеня з явносцу Общого шпиталю Вербас Славица Отович, Борис Биєлович зоз здруженя „Мултиарт” и член Општинскей ради задлужени за транспорт Ґоран Пейович.
У делеґациї зоз Свиднїку, зоз паном Голодняком, були и Виєра Дерцова, Владимир Шандала и Петер Решетар, змесценє под час пребуваня у Сербиї им обезпечела локална самоуправа Вербас, док им „Карпати” були домашнї и орґанизовали им даскельо нащиви и стретнуца под час пребуваня у Сербиї.
