Госци на Служби у Катедрали

автор маф
781 Опатрене

РУСКИ КЕРЕСТУР – Вчера, внєдзелю 26. авґуста, на Велькей Служби Божей на 10 годзин, попри домашнїх, присуствовали и госци зоз Словацкей котри у Керестуре пребували на „Дньох керестурскей паприґи”. З домашнїм капеланом о. Владимиром Медєшом Службу служел и їх священїк о. Станислав Дихенещик. Вон поволал Керестурцох у Братислави же можу и там поглєдац свою Церкву.

На концу Служби о. Медєши привитал госцох, а о. Станислав похвалєл домашнїх же ту, за 260 роки кед ше приселєли з крайох дзе и вони нєшка жию, принєсли и свою грекокатолїцку виру и же ю зачували по нєшка. Тиж пожадал же би так остало ище голєм тельо роки.

По Служби госцох домашнї капеланє о. Медєши и о. Михайло Шанта одведли и до крипти под Катедралу дзе поховани нашо владикове. О. Станислав своїх краянох здогаднул же кельо тоти владикове, од Нярадия, прейґ Сеґедия и Микловша, важни и за тамтейшу грекокатолїцку Церкву.

Як визначел, вони помагали и им у Прешовскей епархиї, дзе тиж окончовали епископску службу, и вишвецовали числених священїкох у нєлєгких часох, поготов у комунизму. Як подзекованє владиком подаровали свою молитву през Панахиду хтору предводзел о. Станислав.

О. Дихенещик иншак парох у Братислави, а родом зоз Сланского Нового Места, як и нашо госци. З тей нагоди вон як парох на грекокатолїцкей парохиї у главним городзе Словацкей поволал и нашо руски фамелиї зоз Керестура хтори ше там нєдавно преселєли же можу поглєдац свою Церкву и приступиц до єй заєднїци и на богослуженя.

ПОВЯЗАНИ ТЕКСТИ