КОЦУР – Културно-просвитне дружтво (КПД) „ДОК“ и Союз инвалидох роботи з Коцура поряднє участвую у акциї „Зоз затичку по ошмих“, та и тераз назберали 19 мехи затички з пластичней амбалажи. Затички зберали у просторийох Союзу инвалидох роботи и по обисцох Коцурцох, а представителє акциї „Зоз затичку по ошмих“ вовторок, 6. юния, у Коцуре превжали назберани затички. Найзаслужнєйши за таке вельке количество назбераних затичкох член Союзу инвалидох роботи Дьордє Зорич.
Плановане же у Коцуре пошвидко будзе и окреме представена акция „Зоз затичку по ошмих“, пре подзвигованє свидомосци гражданох о значносци збераня затичкох, и то нє лєм з фляшох, алє и зоз шицкей другей амбалажи за рижни продукти хтора ма пластичну затичку, меншу, лєбо векшу.
КПД „ДОК“ и Союз инвалидох роботи поволую Коцурцох же би приношели затички до просторийох Союзу инвалидох роботи (стара млєкарня у центре) и так допринєсли акциї. Затички мож принєсц кажди дзень од 10 до 12 годзин.
Як познате, дзекуюци збераню затичкох, односно тей гуманитарней акциї, дотераз уж седемнацецеро дзеци достали инвалидни помагадла купени з пенєжу з предаваня пластичних затичкох.
