ЗОМБОР/РУСКИ КЕРЕСТУР – На Окружним школским першенстве з атлетики, хторе стреду, 10. мая отримане у Зомборе, атлетичаре ОШ и штреднєй школи „Петро Кузмяк” з Руского Керестура у своїх дисциплинох и возростох освоєли два перши и три треци места, а першопласовани буду участвовац на Медзиокружним змаганю.
Як Рутенпрес поинформовала їх наставнїца, професорка физичного воспитаня у керестурскей Школи Саня Тиркайла, перше место у скоку до висока у конкуренциї пиятих и шестих класох освоєл Дарко Надь, котри палїцу прескочел на висини од 1,45 метери, з чим поставел и нови особни рекорд.
Перше место у руцаню кулї освоєл Неманя Ковачевич, тиж у конкуренциї пиятих и шестих класох, а кулю доруцел на 9,04 метери, з чим поставел свой нови особни рекорд.
У конкуренициї пиятих и шестих класох у скаканю до далєка Алексей Бики освоєл треце место (4,16м), у конкуренциї седмих и осмих класох у скоку до висока треце место освоєл Никола Накич (1,45м), як и Антония Монар, котра треце место у скаканю до висока освоєла у конкуренциї штредньошколкох (1,45м).
По витворених резултатох, хлапцовска екипа школярох седмих и осмих класох завжала треце место на цалим змаганю, а у тей катеґориї ше змагали пейц екипи.
Як першопласовани у своїх дисциплинох и катеґорийох Дарко Надь и Неманя Ковачевич виборели пласман на Медзиокружне змаганє, хторе будзе 16. мая у Новим Садзе.