Два треци места на Медзиокружним змаганю

автор зам
911 Опатрене

НОВИ САД /РУСКИ КЕРЕСТУР – На Медзиокружним першенстве у школскей атлетики, хторе 16. мая отримане у Новим Садзе, участвовали и двоме школяре-атлетичаре з рускокерестурскей ОШ „Петро Кузмяк”.

У скаканю до висока у конкуренциї пиятих и шестих класох Дарко Надь на змаганю прескочел палїцу на висини од 1,52м, з чим поставел свой нови особни рекорд, и на Медзиокружним змаганю освоєл треце место и бронзову медалю.

У руцаню кулї, тиж у конкуренциї пиятих и шестих класох, Неманя Ковачевич кулю доруцел на 9,38 метери, цо тиж його нови особни рекорд и на Медзиокружним змаганю завжал тиж треце место и освоєл бронзову медалю.

Керестурци ше змагали зоз школярами-атлетичарами зоз Сивернобачкого, Южнобачкого, Заходнобачкого и Сивернобанатского округу, а за змаганє их пририхтала їх наставнїца, професорка физичного воспитаня у керестурскей Школи Саня Тиркайла.

ПОВЯЗАНИ ТЕКСТИ