МИКЛОШЕВЦИ (ГОРВАТСКА) – У орґанизациї Ради рускей националней меншини Општини Томповци и домашнього КУД „Яким Ґовля”, у Миклошевцох вовторок, 6. юния, шветочно означени Дзень Руснацох у Републики Горватскей (РГ).
По интонованю гимни РГ и Шветочней шпиванки Руснацох у РГ, хтору виведли Женска и Хлопска шпивацка ґрупа з Миклошевцох и Петровцох, а на гармоники их провадзел Звонко Еделински, на културно-уметнїцкей програми участвовали аж три културно-уметнїцки дружтва – КУД „Осиф Костелник” з Вуковару, КУД „Яким Гарди” з Петровцох и КУД „Яким Ґовля” з Миклошевцох.
Пристних привитал подпредсидатель Ради рускей националней меншини Златко Гирйовати, а Швето Руснацом повинчовал началнїк Општини Томповци Здравко Звонарич.
На Академиї присуствовали и доначалнїк Општини Томповци спред рускей меншини Славко Ждиняк, предсидатель Координациї Руснацох РГ и предсидатель Ради Вуковарско-сримскей жупаниї Борис Бучко, Представителька рускей националней меншини Осиєцко-бараньскей жупаниї Агнетка Балатинац, член Совиту за национални меншини РГ и секретар Союзу Русинох РГ Звонко Костелник, подпредсидатель Союзу Русинох РГ Владо Русин, викар Славонско-сримского викарияту, миклошевски парох о. Яким Симунович и петровски парох и вицевикар спомнутого викарияту о. Владимир Седлак.
Стихи о Руснацох Михала Ковача, Силву Ерделя и Агнетки Балатинац рецитовали Матей Мудри, Анамария Мудри, Сабина Ждиняк и сама Балатинцова, а у музичней часци насупели Кристиян Миклош з Вуковару, Хлопска шпивацка ґрупа з Петровцох, Женска шпивацка ґрупа з Миклошевцох и трио Батакович-Колєсар-Мудри. Програму, а наступела и як соло-шпивачка, водзела учителька Леся Мудри.