РУСКИ КЕРЕСТУР – Штерацецседмерим матурантом рускокерестурскей Штреднєй школи з домом школярох „Петро Кузмяк” вчара шветочно уручени дипломи на пригодней програми у Велькей сали Дому култури, а за школярку ґенерациї преглашена Катарина Сапун з Кули.
Програма почала з матурантску гимну „Ґаудеамус иґитур”, а младши штредньошколци своїм товаришом пририхтали пригодну програму, на хторей читали їх литературни роботи и шпивали.
Од матурантох ше з пригоднима словами одпитали директорка Школи Хелана Пашо Павлович и класни старшини IV-1 – оддзелєня Ґимназиї на руским язику Еуфемия Чапко, IV-2 – оддзелєня Ґимназиї на сербским язику Тат’яна Колесар и IV-3 – оддзелєня напраму Туристични технїчар Єлена Миркович и пожадали им успишне дальше школованє и щесце у живоце.
Школяром подзелєли дипломи о законченим матурским испиту, хтори з 10 матурантох IV-1 оддзелєня 6-еро положели з одличним успихом, 3-йо з барз добрим и єден школяр з добрим успихом. З 9 матурантох IV-2 матурски испит з одличну оцену положели 8-еро, а єден школяр з барз добрим успихом, док зоз IV-2 оддзелєня з 28 школярох дипломи за одлични успих на матури достали 18, за барз добри 7 и за добри 3-йо школяре.
За школяра ґенерациї директорка Школи преглашела школярку IV-2 оддзелєня Катарину Сапун з Кули, котра подзековала за припознанє Школи, професором, родичом и шицким товаришом за вєдно препровадзени час школованя.